حلو البرنامج ده
أنا برضه زي بلال فضل سعيدة بنفسي اني ساعتها ما كلتش من الكلام بتاع الخطاب
D:
و ما كانش عندي ولو ذرة تعاطف مع مبارك..بالعكس كنت حاسة ان كلامه مستفز لمشاعر الناس وصيغة الكلام فيها غرور و عجرفة عشان كده استغربت جدا لما عرفت ان في ناس عيطت!
أصلا عمري ما تعاطفت مع الراجل ده..من و أنا صغيرة.
في حاجة فاكرها من زمان و فضلت ثابتة في دماغي
وتقريبا ده كان أول انطباع في حياتي أكونه عن مبارك
سمعتهم مرة بيقولوا "مبارك حضر جنازة فريد شوقي و ما حضرش جنازة الشيخ الشعراوي"
الكلام ده كان في98..يعني كان عندي 7 سنين
اللى فاكراه اني ساعتها ماكنتش بحب فريد شوقي..ماعرفش ليه..و كنت بحب الشيخ الشعراوي (ربنا يرحمهم و يغفر لهم)
فمبارك بقى مع فريد شوقي و بسام بتاع كابتن ماجد في فريق الأشرار
هم كانوا دايما بيتكلموا في السياسة .. و أنا كنت بحب أسمع
حتى الشيخ حمد ما كنتش بحبه ولا كنت بحب صوره اللى دايما محطوطة في أول الأجندات
كنت و( مازلت ) بحب البلد و الناس بس هو لأ
عشان كنت بسمعهم بيقولوا انه عمل انقلاب على أبوه (الشيخ خليفة) بمساعدة أمريكية و استغل فرصة انه مسافر
و ان الشيخ خليفة كان راجل كويس و أحسن منه
أنا ماشفتش الشيخ خليفة..بس كنت حاسة ان حمد شرير جدا..و ان إزاي حد يعمل كده في باباه؟
و بالتالي أصبح حمد و مبارك و فريد شوقي و بسام بتاع كابتن ماجد في فريق الأشرار.
فريق الأشرار بتاع رؤساء الدول و بسام فضل يكبر و يزيد كل ما الواحد كبر
مع ان الحياة مابقتش أبيض و أسود زي ما الواحد كان شايفها
بس هم أثبتوا استحقاقهم للقب أشرار عن جدارة
و الجايزة الأولى مش عارفة تروح لمين بصراحة؟
مبارك ولا صالح ولا القذافي ولا الأسد؟
___________________
بسام طلع راجل غلبان..هو كان بيعمل ايه غير انه يزق كابتن ماجد و يكعبله؟
بس يمكن لو كان موجود لحد دلوقتي مبارك كان هيبعتله قناص يقومله بالليلة
__________________
من كل رؤساء الدول العربية اللى عاصرتهم
ما احترمتش و قدرت غير الشيخ زايد (ربنا يرحمه و يغفرله)
