بسم الله الرحمن الرحيم
اول حاجة احب اعرف بنفسي.......
انا فانيلا ... عمري 16 ..وبدرس فى سنه 3 ثانوي .
ثاني حاجة عايزة اقولها هى انى لسه مبتدئة فى عالم التدوين... يعنى لسه KG1 وعايزة اتعلم .
فكرة التدوين بدات معايا من كام سنة .. كنت مره بتفرج على الجزيره للاطفال :) ...
وعرضوا فقرة عن التدوين .. ساعتها شفت ولاد وبنات من بلاد المغرب وكانوا بيستخدموا مدوناتهم تقريبا زي الفيس بوك ... مع الفارق طبعا .... بس
ساعتها عجبتني الفكره جدا وكان نفسي اعمل بلوج بس مكنتش عارفه هعمل فيها ايه .
وبعدها بفتره قلت اشوف المدونات المصريه وايه اللى بيتكتب فيها ، بس اتصدمت ..... كل المدونات اللىدخلت عليها كانت سياسيه بس وكمان لقيت فيها حجات معجبتنيش ... زي انهم بيكتبوا الفاظ مينفعش حد يقولها ولا يسمعها وده بيسىء للحاجه اللى بيكتبوها حتى لو كان المضمون كويس .
ساعتها قلت بلا تدوين بلا بتاع وكان كل ما الفكره ترجعلى اقول لنفسي هكتب ايه ... وانا في مدرسه ومعنديش وقت .
المره دي لما فكرت قلت مش مشكله ... هكتب اللى يجي فى بالي وهعبر عن نفسي بطريقتى ... مش لازم اكون كاتبه جامده واسلوبي محصلش .... كمان كده كده انا كنت بضيع وقت فى حجات تانيه غير المذاكره .
مش عارفه تجربتي هتنفع ولا لأ ، ومش عارفه اذا كنت هفضل اكتب لنفسي وبس ..... بس على الاقل حتى لو محدش عرف مدونتي او محدش قرالى غيري ..، هكون عملت حاجة كان نفسي فيها ..يعني محرمتش نفسي من حاجة ... ويكفيني شرف المحاولة .
اخر حاجة بقى ...... هي سبب اسم البلوج ..
فانيلا ده النيك نيم بتاعي وانا بحبه جدا ، فانيليا بالشوكولاته يعنى ابيض وبني ، والشوكولاته هى اللى مش هتخلي الفانيليا لونها ابيض نقي .. قصدي ان جوايا فانيليا .. بس معاها شويت شوكولاته ـ جالاكسي على فكره :) ـ عشان مفيش حد ابيض 100% .....
وانا مع اني بحب الفانيليا فى الايس كريم بس مش باكلها الا مع الشوكولاته .. بحس انهم بيكملوا بعض ... او طعمهم بيظهر مع بعض ..
كده انا خلصت كلامي كبدايه .
و ................... بس
