صيف على الابواب .. وامتحانات على الابواب برده ...

انا مش عارفة .. هو احنا بقينا صيف ولا لسه .. عموما الناس كده كده صيفوا ولبسوا صيفي وجابوا من الاخر ...
هو الجو لحد دلوقتى تمام .. من وجهة نظري يعني ..
بخصوص الصيف ، انا دايما كنت بقول اني بحب الشتا اكتر من الصيف .. كنت بقول الصيف ده حر وشمس وقرف ... ياااه .. ومهما خففت فى هدومك هتفضل حران وزهقان ....
انما الشتا ده حاجة تانية .. كاكاو سخن .. مطر وجو مغيم .. وعيال صغيره طالعة فى الشبابيك والبلكونات مادين اديهم للمطركانهم هيمسكوه .. وناس بتجري فى الشارع .. هدوم تقيلة وكوفيات .. حجات كده بحبها ..
بس الايام اللى فاتت لما الحر دخل فجأة .. اكتشفت اني مكنتش واخده بالى ..ان اجمل ذكرياتي كانت فى الصيف ....
ذكرياتي وانا بلعب مع اخواتي الكبار فوق سطح بيتنا فى قطر واحنا صغيرين ، والشمس واكلة دماغنا بس احنا ولا كان على بالنا .. كل اللى كان فى دماغنا ساعتها اللعب ....
والايس كريم و"اللوليتا" والعصير اللى كنت بحطه فى الفريزر لحد ما يتلج وبعدين آكله بالمعلقة .. متسألوش ازاي ، ومكعبات التلج اللى كنت باكلها ... ومامتي تقوللى " كده غلط هتجيلك اللوز " :) ... ، بس انا مكنتش بقتنع بالكلام ده .......
وايام اللعب والجري فى خامسة ابتدائي فى عز الشمس .. صيادين السمك وعسكر وحرامي ... وعيال مبتهمدش ..، وامتحنات اخر السنة اللى بتخلص فى 4 ايام ............
وأيام اعدادي .. لما كنا بنروح انا وصاحبتي كل يوم من المدرسة للبيت مش .... وكنا لازم نشتري دولسي قشطة واحنا مروحين ، الطريق مكنش قصير والدنيا كانت بتبقى حر ........ بس احنا كنا بنلاقي نفسنا قدام البيت فجأة .......
الصيف ده بالنسبالى يعني حجات كتير .. يعني كورنيش الدوحة والمراجيح .. وايام النقل لبيتنا .. وعمرودياب .. ومرسى مطروح السنة الى فاتت ...حجات كتيييير كتير مقدرش انساها .. اجمل ذكريات واجمل ايام ...
دلوقتي اكتشفت اني بحب الصيف زي ما بحب الشتا ... كل فصل وليه طعم وجو مختلف ...
اصلا كل ايام ربنا جميلة ... وكل صيف وانتم طيبين .......


**********************************************
يا جماعة الخير على رأى السعوديين ... ده تقريبا اخر بوست ليا فى شهر مارس ... احتمال كبير يبقى لحد شهر سبعة وعليكو خير ....
طبعا عارفين ليه .. خلاص باقي من الزمن تييييييييييييت .... ولازم نعلن حالة الطوارىء ... امتحناتي اول سته ... يلا شهرين ونودع حياة المدارس ان شاء الله .... لا تنسوني من دعاءكم ... واستودعكم الله الذى لا تضيع ودائعه ...
*********************************

شكرا لكل الناس اللى قريتلى وشجعتني ونصحتنى ..

Jehad
dr.wael
eric matt
moka
dr. nado

Another day

Another day is .......................

another faces ......

another words .......

another smiles .......

another dreams .......

another chances ........

Do not miss it 

البرد بهدلني ...

البرد مبهدلني آخر حاجة ...
سبحان الله ، انا كل سنة كان بيجيلي برد ويفضل معايا طول الشتى .. وساعات كان بيكمل معايا للصيف :) ..
السنادي مجاليش طول الشتى .. بس جالى فى الاخر ... يلا الحمد لله على كل حال ..
امبارح حصلي موقف يضحك ... بخصوص البرد
كنت فى درس التاريخ ..وسحت خالص والمناديل اللى معايا خلصت .. حاجة صعبه ..:)
قعدت مش عارفه اركزفى الدرس .. والمستر عمال يقول لو مفهمتوش النهارده مش هتفهموا ..قشطه.. انا اصلا كنت فى دنيا تانيه .
سألت كل البنات اللى معايا بصوت وااااااطي .. واشاور .. ... باءت كل محاولاتى بالفشل .. معرفتش اعمل ايه ... المدرس كان منهمك فى الشرح ، وانا عايزه افهم بس مش عارفه .. رحت عملت زي العيال الصغيره فى الحضانه .. وقلتله .. مستر انا عايزه مناديل ... فى الاول باين مستوعبش .. قاللى نعم .. قلتله عندي برد وعايزه مناديل.. وعلامات البلاهه كلها فى وشي .. اصل انا لما بيبقى عندي برد .. علامات البلاهه بتطلعلي .. المهم هو سكت شويه كده وبعدين .. قال انا مش معايا يا جما عه محدش معاه منديل.. العيال كانوا عمالين يضحكوا معرفش ليه !
المهم الناس سكتت برده شويه .. وبعدين الولاد اللى كانوا معانا حطوا جيوبه فى جيوبهم ..قلت خير .. وبعدين طلعوا ايديهم فاضيه .. قلت مش خير... وبعدين المستر قام وحط ايده فى جيبه .... قلت اكيد مش هيلاقى .. جت عليه .. هى ليلة سيحان .. الغريبه انه طلع واحد من جيبه .. قلت خير ..بعدين راح مرجعه تاني وقاللى لا ده مستعمل :)...
كنت فى موقف لا احسد عليه .. صاحبتي قالت لاخوها اللى كان جمبها .. متنزل تشتري مناديل ... شفتوا اللي الليله دي كلها .. وبعدين فين وفين .. راح واحد من العيال مطلع واحد من جيبه .. تقريبا مكنش عايز يدهولى ..بس انا مركزتش .. قلتله شكرا .. وحسيت انه انقذ حياتي .. ولو انه طلعه بالعافيه .. عموما كتر خيره ..
بس كل الليله دي عشا ن حتتة بتاع ، اكيد المدرس كان بيدعي عليا :) ، بس هو قاللى لو انا كنت هنزلك حد يجيبلك .. قلتله كتر خيرك يا سعادة الباشا .. ماهي كان ليلة شحاته اصلا غير السيحان يعني ..
... اول حاجه عملتها لما نزلت اشتريت كيسين فاين .. مش واحد بس ..
الحكاية تعلم اى حد انه يعمل احتياطاته قبل ما ينزل من بيتهم .. بدل شغل الشحاته ده .. عشان ميبقاش فى موقف جميل زي اللى انا كنت فيه ..
هي حكاية مضحكش ولا حاجه .. انا اللى كان شكلي يهلك ضحك ..
يلا ربنا يعدي الدور ده خير على خير ...

It's always opened

في منتصف الطريق وقفت تنظر حولها...
كانت وحيدة ...
فى عينيها بدت نظرات الخوف ...
الرياح تعصف بها من كل اتجاه ..
والشمس يحجب ضوئها الرمال ..
اما هي .. فلا تعرف كيف وصلت الى هناك ..
كل الطرق تشابهت وكلها بدت بلا نهاية...

الرعب يعصر قلبها ...
ومع نزول اول دمعة من عينيها ادركت حقيقة ضياعها ..
فى مكان لا ملامح له ...
فى هذه اللحظة ..
تمنت لو كان كابوسا ..

بدأ الظلام يحل....
الرعب يفتتها ...
والبروده تسري في كل جسدها..
سقطت على الارض ..
لم تستطع التحمل..

تحول وجهها للوجوم..........
جمدت ملامحها..
لم ترى يديها من العتمة.....
تمنت الموت ...
استلقت على الارض ..
اغمضت عينيها ....

همست ..
يارب سامحني.......

ضوء ساطع ضرب عينيها ..
فتحتها..
لترى الشمس تغمر المكان ..
شعرت بشىء غريب يسري فى جسدها ...
وكأنه الحياة ..
نهضت ..
نظرت حولها ..
هذه المرة لم تكن وحدها ..
رأت وجوه تألفها ..
لمعت عيناها ..
ارتسم لها طريق رأت نهايته ..
ابتسمت ..
وخطت اولى خطواتها على الطريق

اى كلام بيـتـــقال

مللتك ... مللت سكوتك .. مللت انهزامك .. مللت تلك النظرة اليائسة البائسة فى عينيكي .
تقولين سأمت الكلام سأمت النضال .. من أجل احلام .. من اجل هلام ..فآثرت الوحدة على الانام ... اريد سلاما ..لا اريد الملام.
وأنا أقول لك ..بل فضلت الاستسلام .. وآثرت المنام .. وسميته سلام .
لذا فهنا الرحيل ..فلن يجمعنا ذات السبيل..وصنعي نبيل .. ورحيلي لك جميل .. وغدا ... تعرفين الدليل .
وختام المقـــال .............
اقول السلام .

ياااااااااااااا فرخاااااية

أنا مش هخاف المرادي .... ضاع من عمري سنين فى الخوف
مش هكون انسان عادي انا هتحدى اي ظروف

نفسي اعمل كده ببجد ... مش عارفه لامتى هفضل اهرب واهرب واهرب وبس .. امتى هواجه؟! بعد ما الوقت يكون فات ؟!
الهروب بييضيع من الواحد حجات كتير ومبيحسش الا بعد ما تكون ضاعت منه .. ومينفعش يرجعها .. واهم حاجه بياخدها منك هى نظرتك لنفسك .. بيخليك تشوف نفسك جبان .. ودي اسوأ حاجة ممكن حد يحس بيها...
انا هربت كتير ومش عارفه امتى هقول " بس كده كفاية" .......
مشيت كتير فى طرق وفى النص لفيت ورجعت تاني لاني لقيت فيه عقبات ... ومش عارفه امتى همشي فى طريق لاخره .
الهربان .. بيفضل طول عمره هربان ومش بيوصل لحاجه ..
المشكلة ان فيه فرق "بين معرفة الطرق وسلوكها" ... وانا عافه فين الطريق الصح بس مش بسلكه ... عارفين ليه ..؟
عشان ناقصني حجات كتير اهمها (الصبروالاصرار) دول اهم حاجتين ممكن يخلو حد يوصل ... وانا معنديش حاجه منهم ...
انا نفسي قصير جدا "على راى مامتي" فى اى حاجه وكل حاجه، وبزهق بسرعه .. حتى والله لو حاجه عايزاها جدا ، حتى فى ابسط الحجات ، الجيمز مثلا عمري ما قفلت لعبه .. او حتى كملت فيها شويه ..بمجرد اني اخسر حياة واحده بوقف حتى لو فاضلي مثلا حياتين ..
فمابالك لو كانت ال BIG GAME .. الحياة ..ودايما بقدم لنفسي المبررات اللى تقوللى مش هتعرفى تكملى ..
واكبر دليل على كده داستي -انا فى 3 ثانوي- انا السنه اللى فاتت قضيتها نوم ، والسنادي مقضياها اكتئاب ... وربنا يستر ..
مش عارفه ايه الكلية اللى بيدخلوها بالنوم والاكتئاب ،لو حد سمع عنها يبقى يقوللى :) ...، واكيد كان نفسي ادخل كلية من كليات <من طلب العلى سهر الليالي> بس بطريقتي مش هينفع طبعا .. مش عشان انا مقدرش .. عشان انا من اهل انا هاهنا قاعدون .. انا مدخلتش المعركة زي فارس شجاع .. لو هزم او انهزم يكفيه شرف المحاولة .. انا اصلا مكنتش فى ساحة القتال .. وحتى لو كنت هناك .. مقدمتش كل الاسلحه ...قدمت اللى يخليني عايشة بس .. مش حكاية هزيمة وانتصار ..
وطبعا فى الاول والاخر الحمد لله و قدر الله وما شاء فعل ..
انا عارفه ان الله لا يغير ما بقوم حتى يغيروا ما بانفسهم .. وانا بحاول اواجه نفسي اهه ، لانهم بيقولوا ان ده جزء من العلاج .. على اساس انى ......... خليها فى سركمم
بس اسالكم الدعاء لاختكم ... ادعولى بالهدايه وان ربنا يعننى على نفسي .