سعد نبيهة :)

Islamic Greeting Card by Alhabib

أقم صلاتك ... تحية

"هل سُئلت هذا السؤال من قبل " ايش تبغى تسير لما تكبر ؟ "
و لما كبرت ألم تسأل هذا السؤال " ايش ناوي تدخل في الجامعة ؟ "
و لما اتخرجت ما سألوك " فين تبغى تشتغل بعد التخرج ؟ "
سلسلة لا تنتهي من الأسئلة " ما انت ناوي تتزوج ؟ متى حتجيب أولاد...وهكذا "
إجاباتها تحكمها اختياراتك .. أتمنى أكون دكتور لما أكبر ..
ناوي أدخل كلية الطب إن شاء الله ..
أبغى أشتغل في أحسن مستشفيات المملكة ..
أبغى أتزوج بعد الوظيفة ..
و أبغى أملىء البيت أولاد ..
طيب خليني أنا أسألك هذا السؤال " متى مخطط تموت ؟ "
"و مع مين حتكون بعد الموت .. أهل اليمين .. أهل الشمال .. ولا السابقون السابقون ؟"
ممكن تجاوب !
طيب بلاش تجاوب و خلينا ندخل في الموضوع ..
يخلق الإنسان مخيّر مسيّر و تخلق الدنيا بكل أنواع المتاع ..
ببساطة إنسان ضعيف أمام كل أنواع و أشكال المغريات ..
و تأخذك الحياة من محطة إلى محطة
و لما تشّد عليك شوية تلاقي نفسك بتقول " بكرة يوم جديد "
و لما تزيد أخطاءك و تملىء الذنوب حياتك
تلاقي لسانك بيقول " أعطي نفسك فرصة "
و فرصة وراء فرصة لمّا تنتهي كل الفرص..
و تصير الأسئلة عن عمرك فيما أفنيته؟
و شبابك فيما أبليته؟
و مالك من فين جبته و على إيش ضيعته؟
صدقني لا مفر من هذه الأسئلة
أنا و إنت لها ... بس جاوب سؤالي الأخير
" ألا تحب أن يظلك الله تحت ظله يوم لا ظل إلا ظله .. ؟ "
حتى أنا أحب أكون في ظل الرحمن ..
إذاً تعال نختار نكون شباب نشؤوا في عبادة الله
و رجال تعلقت قلوبهم بالمساجد ... "

****************************


هذه هي رسالة فريق "أقم صلاتك " لشباب السعودي وللشباب المسلم بشكل عام ...
لطالما أحببت هذه الاعلانات التى كانت تعرض على قناوات ال ام بي سي تحت عنوان "أقم صلاتك" ... اختفت لسنوات ثم عادت من جديد في الفترة الاخيرة ... فى اعلان أبطاله من الشباب ..حيث أن المشروع في الأصل موجه للشباب .. حادث سيارة ، يودي بحياة شابين ..بدر ونواف .. يُعرض الاعلان في ثلاث أجزاء ...لنرى فى الجزأين الأخيرين كيف كان حال كل من بدر ونواف مع الصلاة ..وكيف هي النهاية . . الفكرة واضحة ،والرسالة مباشرة لعدم الحاجة للتعقيد ..اعلان بسيط و مؤثر.. و هكذا أرى الاعلان الناجح . .
أقم صلاتك .. رسالة موجهة من شباب مسلم للشباب المسلم ..وهذه كانت مفاجئتي ..عندما علمت أن الاعلان ليس موجها من مؤسسات سعودية أكبر من كونها فقط شباب سعودي يعمل فى مجال الدعاية والاعلان .. والدليل على ذلك أن باب التبرع مفتوح للمساعدة ..
فريق "أقم صلاتك".. تستحقون التحية .. تستحقون أن نفخر بكم وأن تفخروا بأنفسكم .


**************************
تاريخ المشروع :
ببساطة نحن- شباب سعوديين- هدفنا كان بسيط !
في الحقيقة هو لا يختلف عن أهداف شباب كثير بس نحن اللي شوية مختلفين ...
نحن مجموعة محترفين في مجال الدعاية و الإعلان،
أعمالنا تبدأ من فكرة الإعلان
و تنتهي على اللوحة اللي بتشوفها في الشارع ...
أو الصفحة اللي تقرأها في الجريدة...
أو على التلفزيون !
استراتيجياتنا دائمًا هدفها الأول...
إنك تقتنع تشرب الحليب هذا بدل هذاك..
و تقتنع تأكل البيتزا هذه بدل ذيك...
و تلبس من المكان الفلاني بدل المكان الفلاني.
مهنتنا تحكمها الأمانة لأن تأثيرنا على سلوكك كمستهلك كبير
و معدل الإنفاق الإعلاني السنوي علشان نأثر عليك يزيد عن البليون ريال...
تخيل..إنت أهم مما كنت تتخيل!
و لأنك مهم جاءت الفكرة عام 1999م ..
لو حنأثر عليك تأكل و تشرب و تلبس
من الأولى نأثر عليك تصلي !
يعني ببساطة..إننا نوظف طاقاتنا الإبداعية و القوة المادية اللي يتمتع بها مجالنا عشان
نخلي اللي ما يصلي يصلي!
و قوتنا بعد الله- سبحانه و تعالى- استمديناها من حديث الرسول صلى الله عليه وسلم
((لئن يهدي الله بك رجلاً واحداً خيرلك من حُمر النّعم ))
و تحولت الفكرة عام 2001م إلى أول مراحل مشروع" أقم صلاتك "
و كانت هذه المرحلة تحت عنوان ((أقم صلاتك .. قبل مماتك))
أما المرحلة الثانية فكانت عام 2002م
((أقم صلاتك .. تنعم بحياتك))
و المرحلة الثالثة جاءت عام 2004 م
((أقم صلاتك .. تصفو حياتك))
و بعد الغياب رجعنا لكم بمرحلة رابعة جديدة و مختلفة اتعمدنا نخليها مثيرة و جريئة..
و نسأل الله التوفيق...
فريق "أقم صلاتك"

*************************

يمكنك زيارة موقع "أقم صلاتك " لترى كل الاعلانات الخاصة بالمشروع ..

*************************
كلام على جنب :

كده فهمت........

إني أحدثك لترى فإن رأيت فلا حديث! (النفري)

اني أحدثك لترى

"حياة"

كان تقريباً ، يبدد الوقت

رَسَمَ إناءً

رَسَمَ زهرةً في الإناء

وطَلَعَ عطرٌ من الورقة ،

رَسَمَ كوبَ ماء

شَرِبَ رشفةً

وسقى الزهرة ،

رَسَمَ غُرفةً

وَضَعَ في الغرفة سريراً

و نام

... وحينَ استفاق

رَسَمَ بحراً

بحراً عميقا

و غَرِق .

******************

دي قصيدة "حياة" للشاعر وديع سعادة ...

وديع سعادة ولد العام 1948 في قرية شبطين شمال لبنان وعمل في الصحافة العربية في بيروت ولندن وباريس قبل هجرته الى استراليا في أواخر عام 1988 وما زال يعمل في مجال الصحافة في استراليا كما أنه يكتب لعدد من الصحف في الدول العرب.

صدر لوديع سعادة تسعة دواوين:
ليس للمساء أخوة - 1981
المياه المياه - 1983
رجل في هواء مستعمل يقعد ويفكر في الحيوانات - 1985
مقعد راكب غادر الباص - 1987
بسبب غيمة على الأرجح - 1992
محاولة وصل ضفتين بصوت - 1997
نص الغياب - 1999
غبار - 2001
رتق الهواء - 2005

********************

كوني طالبة بدرس أدب انجليزي ،واللى هو تخصصي، كان حتما ولابد أدرس أدب عربي ، قال يعني هنسى العربي لما أدرس اربع سنين أدب انجليزي ، المهم .. القصيدة دي "حياة" لقيتها فى كتاب العربي بتاعي وانا بدعبس فيه ، الحقيقة انا لحد انهارده مكنتش اعرف مين وديع سعادة .. بس القصيدة لفتت نظري ، وعجبتني جدا ... ولما دورت لقيت لوديع سعادة قصائد تانية عجبتني جدا برده . يعني أنا مش عارفة هي ليه اسمها قصيدة .. هو فيه ناس مش بتعترف بالمدرسة دي فى الشعر .. أو مش بتعتبر ده شعر أصلا ... بس أنا عجبتني كتيرمن قصائد وديع سعادة ومش كلها .. مع اني بصراحة باخد وقت عشان أفهم القصائد اللى زي دي .. وفى بعض الاحيان مش بفهمها خالص..ويمكن غموضها هو اللى بيشدني .. أم هند .. دي قصيدة تانية اسمها " الوصول " :

الوصول

يرمي قطعةً ويمشي خطوة
الحمولةُ الثقيلة تعيق سيره
تعيق وصولَه،
يرمي قِطَعاً عن كتفه
قِطَعاً من جسده
من قلبه من عينه من رأسه من ذاكرته
ويمشي،
كلَّما رمى قطعةٌ مشى خطوة
وحين صار فارغاً تماماً
وَصَل.

*********************

ودي " لم يرَ "


لم يرَ

الذي أخذه إلى الطريق وَصَل قبله
والذي أخذه إلى الحافَّة تأخَّر عنه
يمشي وحده ولا يعرف
مَنْ أَخَذَه ومَن رماه
اجتازَ الطريقَ واجتازَ الحافَّة
ونَظَرَ من الطريق ونظر من الهاوية
ولم يرَ أحداً.

**********************

أكذب لو قلت فاهمة الشاعر يقصد ايه بالظبت .. بس ساعات بيبقى فيه حجات تتحس مش ضروري تتفهم.. والاحساس بيفرق من واحد للتاني ..
قصائد وديع سعادة اللى قرأتها بشكل عام حسيت فيها بطابع كئيب .. وده ناسبني جدا ..مش لأني كئيبة ..أنا بحالات وحالات.. بس .. معرفش ..

*******************************

لسه مخنوق يا محيي ...نفسي أروح دريم بارك زي السنة اللى فاتت .. واقعد أصرخ أصرخ .. مكنتش خايفة من اللعب ... كنت بطلع الطاقة اللى جواية.. كانت فرصتي الوحيدة ...المكان الوحيد اللى تقدر تصرخ فيه ومحدش يقول عليك مجنون ... رجعت يومها و صوتى رجع بعدي بتلت ايام ... بس بجد بعدها كنت خفيفة جدا .. مع اني اتهديت جدا جدا .

*************************

آه صحيح العنوان اللى فوق ملهوش دعوة بحاجة .. هو العنوان ده كان لعمل من اعمال الفنانة "هدى لطفي " .. اللى هي كانت عندنا يوم الخميس فى محاضرة الAsthetics

أنا كنت تقريبا بنام فى المحاضرة .. لأن المحاضرة كانت من 6 ل 8 مساء استثنائيا.. وانا كان عندي محاضرات من 8 الصبح ..بهدله بهدله ... فالعنوان ده لازق معايا من ساعتها .. معرفش ليه ..فقلت زي ما هو لازقلي ، أحطه فى اي حته ..فانا كده ارتحت ... فيه رواية بنفس العنوان ..بس مش متأكدة لو كان فيه علاقة بين الكتاب والعمل ..يمكن يكون ليها دعوة بالغلاف.

____________________

تحديث : أنا شلت الكلام المتعلق بالجنسية لأنه كان غلط مني
وأنامش هحب ان حد يقول انه مبيحبش المصريين ، مش مضطر يحبهم ، بس فى نفس الوقت مش مضطر يعبر عن عدم حبه ليهم
واللى محبهوش لنفسي مش هحبه لحد

مخنوق يا محيي ..

عارفة انك ملكش ذنب يا أرنوب ... بس أنا اتخنقت ..

عاجبك يعني اللى بيحصل ده ؟!!

ألفريدو ماشي

حجات كتير اتغيرت ..

الطريق ما بقاش واحد .. بس آخر خطوة فيه مش هتبقى بتاعتي ..

وفي الحالات اللى زي دي ....

لا بستنى حد .. ولا بزعل على حد .

"A different kind of "5amsa

ب . ح . ب . ن . ا


:
:


A . G . M . M . O

برهان

" الحياة حلوة ..بس نفهمها "
::
::

والى أن نفهمها
::
::

الحياة وحشة

يمكن علشان كده!!

هو ينفع حد ينشر رسالة فاضية ؟
بيتهيألي عادي ..

هو ليه المدونات فجأة بتختفي و تضيع من صاحبها ؟
علشان ببلاش يمكن
على فكرة دي حاجة غبية جدا .. يعني فجأة كده متلاقيش كلامك اللى كتبته فى شهور وخد من وقتك و مشاعرك .. والناس اللى ردت عليك و حسو بكلامك ..او حتى جاملوك .. ردودهم مش هتلاقيها .. أصلا مش هتلاقى حاجة خالص !

هو أنا لو مدونتي ضاعت هزعل ؟
هو أنا بدخل اصلا !
بيتهيألي هزعل
طيب انسخ البوستا ت واحتفظ بيها؟
ممكن .

هو ليه محدش مرتاح ؟
يمكن علشان مينفعش!
هو ليه أنا مش عارفة ارتاح؟
يمكن علشان غبية!
طيب ليه؟
ليه بحس اني غبية .. مع ان بيتهيألي اني مش غبية؟
هو العيب فين ؟
هو ليه دماغي مش مظبته ؟

هو ليه انا منمتش من امبارح ؟

هو ليه انا بكتب كده ؟

هو ليه حد يقرأ الكلام ده ؟
___________________

تحديث
__________

والله يا جماعة انتو فهمتوني غلط ، أو يمكن كلامي ماكنش واضح .. أنا كنت أقصد ان المدونة لما تضيع هتضيع كل حاجة ..ولما قلت الردود كان قصدي تفصيل بعد اجمال .. على اساس انها من المكونات -حتى لو فرضنا انها مجاملة- فالمدونة بمكوناتها بتاعتى ..محبش انها تضيع ..مش بالضرورة عشان حباها .. بس انا مبحبش حد ياخد حاجتي مني (انا عارفة انه خطأ اليكتروني ..عشان محدش يقول البت عندها عقدة اتهاض) .
ما علينا.. هي كانت ليلة غريبةاصلا ... وانا لما جيت قريت بعدين ، قلت ايه الكلام ده .
عموما تفاديا للمشاكل انا عملت زي ما محمد آل ربيع قاللى بس مش عشان الردود والله :) ..شكرا يا محمد .

موسم يا باشا .. كل سنة وانت طيب

هلّ العيد ( كل سنة وانتو وانا طيبين *)
و رحل شهر رمضان ( اللهم بلغنا رمضان )
ولـّت المدرسة ( لينا كلام تاني )
وأقبلت الجامعة (لينا كلام تاني وتالت )
انقضى شهر كامل منذ آخر مرة دونت فيها هنا .. أو بالأحرى شهرين .. نعم شهرين .. سبتمبر و رمضان ..
سبتمبر كان مليئا بالأحداث .. شعرت به يوما بيوم .. أيامه حملت لى الكثيرمن الأحداث .. كان مختلفا كليا .
رمضان كان كعادته ضيفا عزيزا -بالرغم من اعتقادي بأننا كنا نحن ضيوفه- و ضيفا كريما .. حملت أيامه أجواء روحانية وايمانية رائعة لا نجدها طوال العام .. وحمل لي تجربه جديدة ، أرتني الكثيرو أحمد الله عليها ..
ولأنه الضيف العزيز مرت أيامه بسرعة شديدة .. فكأنه جاء بالأمس ورحل اليوم (سامحني يا ربي ، فلم أكن له نعم المضيف كما كان نعم الضيف ) .
فلكيا تلازم الشهران .. ومشوا معا جنبا الى جنب ف1 سبتمبر هو ذاته غرة رمضان .. لكن لاأدري كيف اختلف شعوري بكل منهما ؟!.. كيف كان أحدهما أطول من الآخر؟!
على كل حال كل عام وانتم بخير .. بمناسبة عيد الفطر .. وبمناسبة العام الدراسي الجديد الذي بدأته وحدي مبكرا .

ليس لدي الكثير الآن لأقوله رغم أن رأسي ممتلئة بالأفكار، و ربما كان هذا السبب .. جئت فقط لأهنئكم .. وحتى أبدأ من جديد ..لذلك .. أراكم على خير جميعا المرة القادمة و
أشوفكم لما أشوفكم و
SaLaM
__________________

*حقا تؤرقني فكرة التدوين فى المناسبات فقط ، وفكرة " زوروني كل سنة مرة " فأنا لا أحبها مطلقا ، فمن السهل أن أضع كل التهاني الخاصة بالعام في تدوينة واحدة أو ربما الخاصة بالأعوام القادمة ثم أحذف المدونة .. لكنه الكسل يا رفاق .. الكسل الذي يمنعني من القدوم الى هنا بالرغم من حبي الشديد لمدونتي ولعالم البلوجر فى العموم .. لكن أعتقد أنه فى الأيام القادمه سيكون تواجدي مكثفا ، وذلك بسبب طلبات الأسياد .. أقصد ال assignments التي بدأت مع بداية الدراسة بلا رحمة ( يعني هتلكك وانا بعمل أي research عشان آجي هنا ) .

رمضان كريم

اللهم أهله علينا بالأمن والإيمان ، والسلامة والإسلام والعافية المجللة ، والرزق الواسع ، ودفع الأسقام

اللهم ارزقنا صيامه وقيامه ، وتلاوة القرآن فيه

اللهم سلمه لنا وتسلمه منا وسلمنا فيه

............

( قُلْ هَلْ نُنَبِّئُكُمْ بِالْأَخْسَرِينَ أَعْمَالًا 103 الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا 104 )

" سورة الكهف "

*****************

ايه .. واثق ؟!

اختيار

هدية واحدة فقط
يجب علي الاختيار
.
.
.
.

.

.

.

.

.

تذكرة طيران إلى الدوحة ... موطن ذكريات طفولتي !!

.
.
.
.
.


جهاز lap top

.

.

.

هديتي التي انتظرتها منذ العام الماضي!! ..

اخترت أن تكون هديتي .. حتى من قبل أن تأتي المناسبة!!

منقذي الوحيد من الحرب الأزلية




اختيار صعب

قد تتقارب كلتا الهديتين كثيرا في القيمة المادية ... ولكن في القيمة المعنوية .. لا يوجد ما يجمع بينهما .. والفروق بعيدة ..

حدثتهم بأني سأكون حقا سعيدة ان حصلت عليهما معا ...
وبالطبع كان الرد قاطعا :)

حسنا ..أحسبني أعلم أيهما سأختار ..

جديد .. مش عارف .. حاليا بالأسواق

عدنا والعود أحمد  ..مش عارفة مين أحمد وعود ايه اللى بيتكلموا عليه .. المهم اني الحمد لله رجعت ...

انا رجعت من المصيف بقالي فترة ... بس اتشغلت بقى فى التنسيق والشغل والأولاد وكده يعني – كنت مرحلة أولى على غير توقعي قبل النتيجة .. واشتغلت وبقيت امرأة عاملة :) -

فبقالي كتير مدخلتش مدونتي العزيزة .. والله كانت وحشاني جدا ..وكل المدونات اللى بحب ادخلها كانت وحشاني .

أخويا seven  عمل مدونة من فترة قصيره..وسماها " مش عارف!!" .. وأنا كان لازم أرحب بيه  فى الأول بس اتشغلت وأجلتها كذا مرة .. معلش .. عموما هو ما شاء الله عليه .. مش محتاج .. وكمان شوية هو اللى هيرحب بيا ... بس الواجب واجب .

أنا مبسوطة قوي انه دخل عالم التدوين ..و ده طبعا بعد الزن عليه .. هو مكنش فى دماغه،عشان كان بيعمل حجات تانية ... بس أنا بقى قعدت اقوله  ما تعمل مدونة يا 7 .. ما تعمل مدونة يا 7 .. لحد ما اقتنع بالموضوع .. وعمل المدونة .. بس سابها ومكتبش فيها حرف .. وبعد مدة ابتدى يدون فيها ...

أنا كنت بزن عليه لسببين .. السبب الاول : عشان يبقى ليا عزوة فى البلوجر :)

السبب التاني : عشان حاسه  انه عنده حجات كتير ممكن يقولها .. وحجات مختلفة جدا ..

أنا شخصيا  معجبة بدماغه قوي ..دماغه متكلفة...

 يعني مثلا ممكن كل الناس تشوف حاجة من زاوية .. هو بيشوفها  من زاوية مختلفة تماما ... ووجهة نظره عنها بتبقى  منطقية جدا ،ومقنعة ... وفى اغلب الاحيان بقول " أنا عمري ما فكرت فيها كده " .. باختصار ..7 تفكيره مش تقليدي خالص..

زائد اني عمري ما اتوقعت هو عايز يعمل ايه .. او بيفكر فى ايه .. دايما بيفاجئنا ...

أول حاجة عملها .. على ما اتذكر .. كانت الكتابة .. أول قصة كتبها كانت وهو فى سنة خمسة ابتدائي .. كانت قصة أطفال .. بس كانت جميلة قوي ومحدش كان متوقعها لأنه كان أول مرة يكتب ..والبيت كله كان فرحان بيه قوي ..والناس كلها شجعته ..

بعدها  مشي فى مشوار الكتابة والقصص القصيره .. وأسلوبه كان بتطور معاه كل ما يكبر.. ووصل لمستوى عالي جدا .. وده مش رأيي الشخصي .. ده كان بشهادة ناس مختصين .. كلهم اعجبوا بيه .. وقالوا عنه موهوب .. وكان دايما بيفاجئنا بكتاباته واسلوبه ...

لحد ماوصل للجامعة تقريبا أو فى اواخر ثانوي يمكن .. اهتماماته مشيت فى حتت تانية .. راحت بقى ناحية التصوير .. والاخراج والافلام وحجات كده ... و  عمل حجات جامده  جدا .. وبرده محدش كان يتوقع منه لا التصوير ولا الاخراج ولا اي حاجة من دول ... وفى كل صورة وفى كل فيلم كان بيفاجئنا  بحجات جديده .. بس على طول احنا فرحانين باللى بيعمله .. وبنشجعه .. ولما بيحتاج رأينا المحايد بيلاقيه على طول بدون مجاملة ..

بس أهم حاجه فيه بجد أنه بيبدع فى اللى بيعمله  ... وبيعمله بطريقة مختلفة .. وبيبقى حاسه قوي..

من الآخر .. ممكن أقول عليه فنان .. أو مبدع و دي كلمة أشمل .. 

أنا  مش هتكلم عليه أكتر من كده ... فى النهاية هو اخويا .. وشهادتي فيه مجروحة .. وممكن ناس تشوف أني ببالغ ... بس ان شاء الله ربنا هيكرمه .... والايام هى اللى هتثبت .. لانه باذن الله هيبقى حاجة جامدة فى المستقبل .. 

أنا عايزة أقوله اني فخورة بيه .. فخورة لأنه أخويا .. وبعيدا عن كونه اخويا .. فرحانه ان في ناس زيه .. وبنفس دماغه ،فى سنه ده .. 

وآخر حاجة أقوله ربنا يكرمك ويوفقك فى مستقبلك .. وفى أي حاجة هتعملها بعد كده ، عشان مش عارفه انت هترسى على ايه  :)  ..بس لما تشتهر ياعم ابقى افتكرنا زي ما قلت .. والعيل اللى يرجع فى كلامه . 

أنا كده خلصت اللى عندي الى الآن .. أشوفكم لما أشوفكم ان شاء الله  ..

 SaLaM

فانيليا ..off

فاضلي ساعات واسافر ... متقلقوش مش بعيد..عارفة ان "البلد دي احسن من غيرها" .. مشوار صغير اصيف واجي على طول ان شاء الله ..
عايزاكم تاخدو بالكم من المدونة فى فترة غيابي .. وتحطوها فى عنيكم ..ومتسسوهاش خالص اني مش موجوده ..تمام
يلا .. أستودعكم الله .. و أشوفكم لما أشوفكم ..
SaLaM

نجحت يا جدعان

الحمد لله الحم دلله الحمد لله الحمد لله الحمد لله
الحمد لله الحم دلله الحمد لله الحمد لله الحمد لله
الحمد لله الحمد لله الحمد لله الحمد لله الحمد لله
الحمد لله الحمد لله الحمد لله الحمد لله الحمد لله
الحمد لله الحمد لله الحمد لله الحمد لله الحمد لله
الحمد لله الحمد لله الحمد لله الحمد لله الحمد لله
أكيد عارفين أن النتيجة طلعت يوم الاثنين .. أو الثلاثاء عشان ظهرت بعد الساعة 12 ...أحكي من الأول ولا من الآخر ؟! هحكي من الأول ..
يوم الأثنين بعد ما كتبت البوست اللى فات .... سبت "صفحة وزارة التربية والتعليم ..منهم لله "
مفتوحة على اساس ان النتيجة هتطلع عليها يعني وقعدت اتفرج على التليفيزيون - كنت بتفرج على معز مسعود – وكله تمام ...
طبعا طول الوقت التيليفون كان بيرن .. والعيال اصابي يسألوني : هاه ايه الاخبار . وردي كان بيبقى : أنا فاتحه الصفحة اهه .. لسه مفيش حاجة ... كاتبين النتيجة بعد قليل ...
الى ان جائتني الصاعقة ...
تررن تررن ..
أنا : الو
صوت حزين يتكلم " واحدة صاحبتي متعرفوهاش" :ايوة يا فانيلا .. جبتي النتيجة ؟
أنا : لأ .. هي طلعت أصلا ؟!!!
صاحبتي بنفس الصوت الحزين : ايوه طبعا وانا جبتها .
أنا وقلبي وقع فى رجليا : طيب وعملتي ايه ؟!
صاحبتي وهي شبه بتعيط : جبت 91 .
أنا وأعصابي باظت خالص : طيب يا بنتي حلو .. مبروك يا حبيبتي ... هي : الله يبارك فيكي ...
أنا: بصي هقفل عشان أشوف هعمل ايه عشان النتيجة مش طالعة عندنا ..سلام .
عملت ري فريش والصفحة زي ماهي ...بعد قليل ..
في نفس اللحظة رن تيليفون تاني ...
..تررن ترررن ..
أنا بكل توتر طبعا :ايوه ..
خالتي : أيوه يا حبيبتي عملتي ايه ؟!
أنا : ما عملتش حاجة .. لسه ما جبتش النتيجة .
خالتي : طيب رقم جلوسك كام .
أنا : ( أخ لا كله الا ده ) عايزاه ليه يا خالتو ؟؟ ( سؤال زكي صح ..لأ .. سؤال استعباط) .
خالتي : يا بنتي هاتي اجيبلك النتيجة ..
أنا : لأ يا خالتو لأ ..أنا عايزه أكون أول حد يتصدم بيها
وبعد حوار وجدل ومناهده .. أقنعتني خالتو اني اديها رقم جلوسي .. خصوصا ان البيت كله كان على أعصابه ... ومرضتش اتعب اعصابهم أكتر ..
عدت دقائق .. وخالتو اتصلت .. وبشرتني بمجموعي .. بجد ساعتها ماصدقتش نفسي من الفرحة لعدة أسباب : أولها اني مكنتش متوقعة المجموع خالص خالص خالص .. تانيها ان المجموع ده بقالي كتير مش بجيبه .. تالتها ..ان المواد اللى كنت خايفه منها الحمد لله جبت فيها درجات حلوة ... أنا مفرحتش عشان المجموع فى حد ذاته .. فرحت عشان جزء كبير من ثقتي فى قدراتي رجعلي تاني ..
أناكنت مرتبة نفسي اني هرضى باللى ربنا هيدهولي .. والحمد لله كرمني . شعوري ساعتها ..مايتوصفش ..
بعد ما فقت شوية كده : حاولت اجرب تاني على صفحة الوزارة .. عشان اطمأن على صحابي .. لقيتها زي ماهي .. اصلا ناس كتير ما عرفوش يجيبوها .. بما فيهم المشتركين فى الدي اس ال طبعا ... لان ولاد ال ... الله يسامحهم ... باعو النتيجة لأربع شركات بس من ضمنهم لينك ومصراوي .. وعشان كده ..بتوع
تي أي داتا معرفوش يعملوا حاجة ... بلد كل حاجة فيها بايظة .. حتى دي بيبيعوها ؟
خالتي اليوم ده كانت هتولع فيا .. لاني اديتلها قائمة بأسامي " الاقارب والجيران والأصحاب " ... استغلال بقى هتقول ايه ..
واليوم ده بردو مصر كلها كانت بتكلم بعضها لحد الصبح .. وكأننا الظهر مثلا .. حتى أنا .. نمت بعد صلاة الفجر.. بس نمت بعد ما هيست جدا جدا .. ولو ما كنتش نمت كنت هبقى فى حته تانية غير بيتنا .

على كل حال ... آسفة لأني طولت عليكم .. أصل كان عندي كلام كتير ... وغالبا نسيت حجات كتير بردو ...
عايزة بس أبارك لكل الناس الناجحين .. مبرووووووووووك ... وأقول لكل طلاب العلمي وخصوصا علمي رياضة .. اللى امتحاناتهم كانت غبية ... منهم صاحبتي اللى كنت بتكلم عليها متزعلوش وان شاء الله لو ما جالكوش اللى انتو عايزينه .. هيعوضكم بحاجة احسن ... مع اني شايفة ان مجموع 91 حلوجدا .. بالنسبة لبلد" طبيعي " ..مش احنا طبعا..

ايه ده ؟! هو أنا ما قلتش نتيجتي ؟! من باب الغلاسة مش هقول ..بس لو حد سألني هتنعطف وأقول .. بس اوعى. .اوعى ..حد يقول :من باب الغلاسة مش هسأل :)
كفاية قوي كده .

SaLam

أقرا داخل العدد ..

اليوم - مش اليوم بالظبط ..يعتبر بكره - تستقبل الآنسة فانيلا نتيجة اختباراتها فى المرحلة الثانية من الثانوية العامة لعام 2008م ...وذلك بعد ان اعتمد نتيجتها عمووزير التربية والتعليم شخصيا قائلا :خدو بالكم من البنت دي ..البنت دي كويسة .

حيث تصدر اسمها قائمة اواخرالجمهورية ..فكان لنا هذا السبق الصحفي معها...والذي تنفرد به مدونة "فانيليا بالشوكولاته" ..تابعونا ..

- انسة فانيلا اسمحي لي ان أطرح عليك بعض الاسئلة .

قوي قوي اتفضلي .

- ما هو شعورك الآن ،حيث لم يتبق من الوقت على ظهور النتيجة سوى ساعات ؟

بسم الله الرحمن الرحيم ..والله احنا أدينا كويس و وعملنا اللى علينا ووالجمهور....

-لحظة لحظة من فضلك ..أنا لا اسألك عن نتيجة المباراة انما أسألك عن ....

... خلاص خلاص فهمنا ..انتى فاكراني مش فاهمة يعني (ايه الناس دي) ..بصي يا ستي ..بكل صراحة مش حاسة بحاجة ..مش زي السنة اللى فاتت ..عادي مستنياها بس من باب الفضول بس ..واللى ربنا يجيبه هرضى بيه ان شاء الله (ربنا يستر) .

-افهم من ذلك انه لا استعدادات ولا طقوس تقومين بها قبلها ؟

(طقوس ايه يا حاجة) فى الحقيقة لأ .. كل اللى عملته انى خدت كل ارقام جلوس الاصدقاء والجيران والاقارب وطنط فوفو وجدو صابر والمولود الجديد احمد على اسم جده و..

- ألم يكن اسم الجد صابر ؟

أظن دي حاجة شخصية.. محبش اتكلم عنها ..( ايه الناس دي ..احنا بندلع كده انتي مالك ).

- (يا حبيبي ) حسنا وماذا عن توقعاتك ؟

4 ـ صفر لصالح الأهلي .

- .................. :S

انتي زملكاوية ولا ايه ؟هههه ...

-.......................... :S

خلاص يا ستي متزعليش ..اصل هتوقع ايه منا قلتلك النتيجة بتاعة ربنا ..بس انا حاسة ان ان شاء الله ربنا هيسترها السنادي معايا ومع صحابي ..بالرغم من الكلام الكتير اللى عليها .

-حسنا ..علمنا ان التنسيق لدخول الجامعات سيبدأ يوم السبت للمرحلة الأولى ..اخبرينا عن رغباتك وتمنياتك واى كلية تودين دخولها ؟

هحط أول رغبة طب وبعدين صيدلة وبعدين هندسة والحجات الحلوة دي بقى .. :)

-........................:S

و الله الوافدين العلمي ممكن يعملو كده .

- ............................ :S

انتي بتزعلي بسرعة ليه مش فاهمة ..هتزليني يعني عشان أدبي ولا ايه ...شوفي..ااصلا في الغالب انا مش مرحلة اولى فى التنسيق ..بس عموما.. انا كنت عايزة حجات كتير بس مجموعي بتاع السنة اللى فتت ميجبهاش .. انا بحب اللغات جدا ..فأي حاجة فيها لغات احب اني ادخلها ..بس لو محصلش كده ..هحاول اجتهد بقى فى اي حاجة ادخلها ..(ربنا يستر) .

- (حمدا لله ..اول اجابة مفيدة ) جيد ..كلمة اخيرة تودين في قولها ؟

ايون احب أقول لكل شاب وفتاة ...

-بدون مزاح لو سمحتي .

(يعني اقوم اديها باللكمية فى وشها ) .طيب هو أنا قلت حاجة ..منا بجاوب اهها... قصدي يعني أقول لكل الطلبة والطالبات ان ربنا مش بيضيع تعب حد ..اللى زاكر مش زي اللى مازاكرش ..واللى اشترى الامتحان او غش مش زى اللى زاكر وتعب طول السنة..وحتى لو ده مبنش فى الاول ...بيبان فى المستقبل ...وتوفيق ربنا ده أهم حاجة فى الموضوع كله فى اي مجال كان ...

كمان احب اقول ان الحياة مش بتقف عند حاجة ..والثانوي العامة دي مرحلة بس مش اخر الحياة ..وده ممكن نلاحظه من الناس اللى حوالينا ...سواء جاتلك الكلية اللى انت عايزها او لأ ... الحياة بتكمل ده أكيد . بس كده ...واحب اشكرك وأشكر مدونة فانيليا بالشوكولاته على فكرة مدونة جامده اخر حاجة .. وانا بتابعها على طول :)

- (أخيرا) شكرا لك يا انسة فانيلا لأنك سمحتي لنا بأن ننفرد بهدا الحوار الصحفي معك ...نتمنى لك كل التوفيق انت وزملاءك طلبة الثانوية العامة ..وبالتوفيق .

شكرا .

(ايه الست دي )

(ايه البت دي )

_________________________________

كان هذا هو الحوار الصحفي الذي قامت به المدونة مع الانسة فانيلا .. فشكرا لمتابعتكم ....و....

(ايه على اساس ان احنا بنتفرج على التليفيزيون مثلا؟؟... قال شكرا على متابعتكم .. ناقص تقول تصبحون على خير )

.. وتصبحون على خير.

هو لازم عنوان؟

بعد ما نزل التنسيق -لأ مش تنسيق دخول الجامعات -التنسيق بيني وبين اخواتى لاستخدام الكمبيوتر والاهم طبعا الانترنت ... ..وطبعا تم دلك نزولا على طلبي لأن "البنات بيتاكل حقها فى البلد دي " .. وعملت شكاوي ومظاهرات وما الى دلك -مش عارفة حرف ده مش طالع صح ليه - للسادة الوالد والوالدة ..وتمت المواقفة على مطالبي ..وتم تقسيم العمل على وحدتين ..وحدة للولاد ووحدة للبنات ..الولاد على الكمبيوتر بتاعنا اللى كنا بنتخانق عليه ..والبنات اللاب بتاع السيد الوالد..ودي طبعا كانت احسن حاجة ..بعد ما خليناها وايرلس... مصدقتش نفسي من فرط سعادتي ..
كانت حاجة جامدة اخر حاجة-فى الاول بس- يعني الوقت هيتقسم على اتنين بدل اربعة ..والتاني اصلا مش بيقعد كتير..
المهم قلت اخد جولة على المدونات وبتاع ..وياريتني ماخدت ..علشان ما شلتش اللاب من قدامي الا والساعة عدت واحدة ..صباحا طبعا ...يااااااااه ..وقت كتير بالعبيط ..كمان مطلعتش باللى كنت عايزة اطلع بيه ..بس اكتر حاجة حسيت بيها وده الغريب هو الملل وهبقى اقول ليه..
بس اكتر حاجة استفدتها ان مفيش حاجة اسمها نت بوقت مفتوح عشان حرام علي نفسي بجد .. فيه حجات كتير ممكن تتعمل فى الوقت ده ..العمر مش بعزقة .
فى جولتى بقى على المدونات اكتر حاجة حسستنى بالملل ..ان فيه مدونات كتير شبه بعضها ..مش فى الشكل طبعا ..فى المضمون..يعني الاساليب متشابه جدا ..وقليل لما لقيت مدونات ليها طابع مختلف ..مش عافة ايه السبب ..انا بتكلم عن الكتابات على فكرة..ومش بقول انى جامدة ولا حاجة ..بس بقول رأيي كقارءة ..
واكتر حاجة لفتتلى نظري بقى البروفايلات بتاعة المدونين ..يااااااه على التوافق بينهم مش معقول يا ربي ..فيه كده حجات مشتركة لازم تلاقيها فى "أغلب " المدونات ... يعني مثلا لازم تلاقي فى الاهتمامات .. القراءة والكتابة والرسم ..-على فكرة دول عندي انا كمان .. :) -
طيب سيبك من القراءة والكتابة ..يعتبروا حاجة طبيعية نوعا ما فى عالم التدوين ..كل مصر بقت بترسم يا جدعان .. محدش يعني بيحب يعمل اي حاجات تانية..كل الناس بتحب التلات حجات دي .. طيب سيبك من دي عادي .. اصلا ياريت كل الناس تقرا وتكتب وترسم ..مصر كلها تبقى مفكرين وكتبة وفنانيين
ليه بقى فى الافلام المفضلة لازم تلاقي فيلم You've Got Mail .. ولما اقول لازم يبقى قصدي لازم .. وبعده فيلم brave heart ..وممكن بعدهcity of angels .. بس الاولاني اكتر حاجة ... مش بقول انها افلام وحشة ..جامدة وكل حاجة ...بس مثلا فيه ناس مش حاطة غير الاولاني مثلا والباقى كله عربي ..طيب ليه ..يعني مشفتش فيلم اجنبي غيره عجبك ...
وحتى الردود اللى المفروض بتعبر عن الرأى الشخصي ..كلها متشابهة .. كأن حد هيضربني أأه لو كتبت حاجة غير ..
على فكرة الحكاية دي مملة قوي وتقرف ..ودي فى كل حاجة فى مصر ..مش بس التدوين ..ابسط الامثلة لو فتحت التيليفزيون ..هتلاقي اسماء البرامج كلها شبه بعض ... يعني حبكت تبقى العاشرة مساء .. وتسعين دقيقة ..الاسمين غير بعض بس بينهم رابط .. وبعدين تسعين دقيقة .. بقى اكتر من ساعة ونص.. ومثلا لماهالة سرحان عملت برنامج الهوا هوانا ..كل اسماء البرامج بقت عن الهوى .. الهوا سوا .. الهوا هواك .. هوانا .. هوا خالتى ...هو هو ..حاجة غريبة
كأن الابداع اختفى .. ومش عايزين نشغل دماغنا ..طيب مش عارف تشغل دماغك ..اقعد في بيتكم ...
يعني نرجع للتدوين تاني .. ليه تسرق بوستا ت ناس غيرك كتبوها وابدعوها وتعبوا فيها ..عايز انت تيجي على الجاهز ..وتاخد تعبهم ..والناس تقول عليك جامد ..طيب لما انت مش بتعرف تكتب عامل مدونة ليه ..
والله زهقت من الكلام وطهقت .. من الاخر مفيش فايدة .. احنا اصلا فى عصر الاضمحلال ..لازم الابداع يختفي .. واصلا مجتش عليه ..
هو موضوعي مش محدد بس معلش.
بس ملحوسة صغنتوتة :انا مقصدش حد بعينه من كلامي ..انا بتكلم بشكل عام .. وتاني مرة ..انا مش بقول على نفسي انى احسن من حد انا بقول رأيي بس .
على فكرة لقيت مدونين كتير جدا من المنصورة ..دي بقى عادي ...تحية لكل المدونين اللى من المنصورة ..عشان بلد بابايا ..بعني بلدي ..أنا بروحها قليل .. بس بحبها قوي
كده خلص الكلام .. أشوفكم لما اشوفكم
SaLaM

طفلة أنا

فى داخلي صغيرة ... تسكن عالم الطفولة...  

تأبى الخروج منه ..

تأبى توديع دماها وفساتينها الوردية .. 

ليس لأنها لم تعرف غيره ...

لكنها ترفض هموم عالم الكبار ... تكفيها هموم الصغار ..

فهل تظل حيث هي ..؟!

أم أن الأيام كفيلة  باخراجها من هناك ؟!

وقفة .. لا تحزن

أجمع العارفون بالله بأن الخذلان : أن يكلك الله إلى نفسك ،ويخلي بينك وبينها . والتوفيق أن لا يكلك الله إلى نفسك .

فالعبيد متقلبون بين توفيقه وخذلانه ، بل العبد في الساعة الواحدة ينال نصيبه من هذا وهذا ، فيطيعه ويرضيه ، ويذكره ويشكره بتوفيقه له ، ثم يعصيه ويخالفه ، ويسخطه ويغفل عنه بخذلانه له، فهو في دائر بين توفيقه وخذلانه .

فمتى  شهد العبد هذا المشهد وأعطاه حقه ، علم شدة ضرورته وحاجته إلى التوفيق في كل نفس وكل لحظه وطرفة عين ، وأن إيمانه وتوحيده بيده تعالى ، لو تخلى عنه طرفة عين لثل عرش توحيده ، و لخرت سماء إيمانه على الأرض ، وأن الممسك له : هو من يمسك السماء أن تقع على الأرض إلا  بإذنه . 

{ابن القيم } . 

 كتاب لا تحزن .. لعائض بن عبدالله القرني .

يحكى أن

يحكى انه كان هناك دب يأكل النهر الذي جف ، وكان هدية من أخته فقال له : أنت الذى فعلت ذلك ، لكن الأرنب لم يسمع كلام امه وضربه ضربة جعلته يقفز فوق السماء الصافية فى كوب الماء البارد ، عندما قطعته الجدة للسمك على العشب الاخضر الدافىء مع السلطة المحلاة باللون الأبيض ، فلم يفلح فى ذلك و أكل كل الطعام  الذي كان على المائدة ذات القدم الواحدة .

وحتى لا يحدث ذلك ،أمطرت السماء بغزارة لتجف الملابس المعلقة فى الصندوق العملاق ... إذا فليخلع كل واحد منكم ساعته ونقذفها على الحائظ المصبوغ باللون الاسود، وهكذا تشتعل النيران فى جيبه مع رنين الهاتف .... هل ينجح في ذلك ؟هذا سنعرفه فى المرة القادمة .

لكن لماذا حدث ذلك ؟ لأن الدجاج لم يأكل البرسيم مع عصير التوت ذا العيون الزرقاء ، و هذا لا يحدث إلا هناااك عند الكتاب ثلاثي الابعاد والضوضاء المالحة ، غدا سوف نذهب لشرائه ، حتى أن القلم لايكتب ... فاغلق الباب جيدا .

ولأن الوقت عير مناسب للعب سقطت اوراق الشجر الممتلئة بالعصافير عند الساعة الواحدة ظهرا بعد العشاء مباشرة . وانكسرت الزجاجة المعروفة.. وصوت النباح يعلو أكثر فأكثر اندفاعا للماء المخزن .. مع أن هذا الورق لا ينقطع  ، ولكن المفاجأة أن احدا لم ينطق وتسرب الدواء من الملعقة الجميلة ، وكان هذا أجمل الموجود على الرف الكريستالى مع البلاستيك المخفوق بالحبر الشفاف... وهكذا نجحت الأميرة فى أكل البرتقال . 

_____________________________________________ 

أولا ليس على طالب الثانوي حرج .

ثانيا انا كتبتها من زمان فى اعدادي ، ولقيتها فعجبتني ، فمحدش يقول ايه التهييس ده .. عشان ده كلام زي الفل .. بس خلاص