كل اللى شفناه طول الاسبوع و التغييرات السريعة تخلي انه من الطبيعي جدا الهيستيريا اللى الناس فيها
ممكن أتفهم جدا ان الناس تنقسم في الفترة دي
بس فيه حاجات من وجهة نظري شايفة انها المفروض تبقى واضحة قدام ناس كتير البعض متجاهلها تماما .. منهم بسبب الخوف .. و منهم علشان بيقتنعوا بالتلفزيون المصري.. و منهم لأسباب أخرى مش قادرة استوعبها ..
هقول شوية حاجات مقتنعة بيها و حاجات استفزتني الفترة اللى فاتت ..
أول الحاجات اللى مقتنعة بيها هي ان مبارك أجرم في حقنا كلنا .. ليه ؟؟
لأنه المسؤول الأول عن الشباب اللى ماتوا و اتصابوا يوم الجمعة (جمعة الغضب..عددهم تخطى ال 150 ) و اللى ماتوا و اتصابوا انهرده في التحرير ( نحسب من ماتوا عند الله شهداء)
محدش بقى يقوللي حبيب العادلي أو غيره هو الغلطان ؟؟؟ لحد امتى هنفضل نحاسب الوزير و نمسك في الفرع و نسيب الأصل
بقالنا سنين بنشتم في الوزراء و مفيش حاجة بتتغير ..عشان المشكلة فيه هو مش في الوزراء .. المشكلة فيه وفي اختياراته و لازم يتحمل نتايجها ..
و أجرم في حقنا لأنه المسؤول الأول عن الفساد في البلد .. فساد الصحة و التعليم و النقل و الداخلية و كل المؤسسات الاخرى.. أيوه معاه حاشية فاسده ده أكيد بس هو زعيمهم ..
أرجوكم بلاش كلام عبيط من بتاع اصله ما كانش يعرف .. يبقى عذر أقبح من ذنب .. يعني احنا كمواطنين عارفين
وهو اللى ربنا هيسأله عننا مش عارف ؟؟ "كلكم راع وكلكم مسؤول عن رعيته" .. لو فعلا فعلا مش عارف يبقى مش كفء لانه يبقى رئيس ..
بس شخصيا شايفه ان مبارك قاتل و رئيس عصابة ودم كل الشهداء في رقبته هو قبل العادلي..
تاني نقطة لازم نتفق عليها هي ان مبارك لم يمنحنا شيئا و لم يتنازل .. كل الحجات اللى قالها في خطابه حقوق .. و لما الواحد بياخد حق اتحرم منه سنين ما بيقولش للي حرمه منه متعمدا شكرا .. هو مش بيمنحك حاجة بتاعته أو يملكها ..ده حقك و انت رجعته ... و في فرق بين انك تاخد حاجه .. وبين انه هو يمنحهالك .. لذلك مفيش حاجة اسمها "شكرا يا ريس" .. ده هو لو كان يقدر ماكانش تراجع و لا خطوة.
ثالث حاجة هي ان مبارك ما يستحقش يمشي بكرامة .. يمشي بكرامة ليه و هو كان بيكسر الكرامة في المصريين كل يوم؟؟ .. المصري اتهان جوه مصر ان كان من الداخلية أو غيرها .. واتهان بره مصر لما محدش كان بيجيبله حقه أو يدافع عنه زي ما كل الدول بتعمل مع ولادها حتى القتلة منهم ..
مبارك عمل حاجة عمري ما شفتها في أي بلد .. رئيس بيعند مع الشعب بتاعه
هم يقولوا امشي و هو يقولهم لأ مش ماشي .. هضربكم و أموتكم و اسفك دمائكم بس مش ماشي .. و كأنها عزبته .. و كإن الشعب كومبارس في فيلم من بطولته هو ..
و طالع يقول انه عايز يصلحها(البلد) قبل ما يمشي ... لأ مع عدم احترامي مش مصدقاك .. اللى خربها عامدا عشان يأدب و يعاقب الناس عمره ما هيعمرها ..
رأيي الشخصي انت لو فعلا ليك انجازات طول ال 30 سنه .. انت ضيعتها بتكبرك و اجرامك و ردود أفعالك البطيئة بطريقة مبالغ فيها
ما حدش يشبهه بالملك فؤاد اللى اتضربله 20 طلقة تحية و هو ماشي .. الراجل كان وطني بالرغم من اصوله التركية .. و مشي بالرغم من انه كان عنده أعوان .. مشي عشان يحقن دماء المصريين .. هناك فرق يا أعزائي ..
و مبارك مش رمز .. واللى بيعتبره رمز يبقى زيه ... كفاية تأليه للرؤساء بقى ..
اللى بيقول بقى انه زي والده هو حر لو دي حاجة تشرفه .. بس مافيش حاجة يا سادة في السياسة اسمها "راجل كبير نحترمه و عنده تمانين سنه و انتو كده بتدخلوا ابوكم دار مسنين" .. ده مش كلام منطق و سياسة .. ده كلام خالتي ام حمادة وهي قاعدة تقمع البامية .. السياسة ما فهاش سن .. السياسة فيها مسؤوليات الواحد يعملها .. لو معملهاش يتحاسب .. و لو مش قادر يعملها عشان سنه يقعد في بيتهم أحسن .. احترمك لما تخدم البلد و تحب ولادها .. تستعبدهم و تطلع عينهم و في الآخر تموتهم طبعا مش هحترمك ..
رابع حاجة ماحدش يقولي ان وجوده دستوري و ما ينفعش نسقطه .. كلنا مش هننسى الانتخابات المزوره ... الله يرحم ال 99.9%
مش معنى ان وجوده أمر واقع يبقى دستوري .. دستور ايه ده اللي بيتفصل على مزاج الرئيس و يخلي كل الصلاحيات في ايده؟؟.. الدستور على بعضه لازم يتغير مش مادتين ولا تلاته.
خامس حاجة ان مبارك ما يتوثقش فيه .. و من ساعة ما وعيت ما شفتهوش وعد وعد و أوفى بيه والله أعلم ايه الورق اللى مخبيه .. مصر اتقلبت في اسبوع .. قدامه 6 شهور الله أعلم هيعمل فيهم ايه و يرتب نفسه ازاي و بمعاونة مين (ما يغركوش ان شكله عجوز و مش قادر يقف على حيله و كلام خالتي أم حمادة ) و أي حد هيحاول يتكلم ساعتها هيقولوله "كفاية بقى حرام عليك احنا ما صدقنا عايزين نعيش في سلام..انت عايز ترجعنا لأيام حظر التجول تاني ..انت عايز تعمل فتنه .. انت عايز تخربها عشان ترتاح .. انت عندك اجندة ...انت ملعوب بعقلك و في قوى خارجية بتستغلك" طبعا كل ده من خلال الاعلام المصري العظيم و هناء و سيد .. الهي ربنا يباركلهم .
سادس حاجة ..ليه صيغة الكلام عن الشباب من قبل بعض الناس "هم و احنا و انتوا و احنا"؟؟ شبابنا طلع ينادي بحقوق كل مصري على أرض مصر .. ما طلعش ينادي بحقوقه لوحده .
سابع حاجة كلمة " الرسالة وصلت خلاص اسكتوا " سمعناها من أول يوم .. و اكتشفنا انها مش واصلة ولا حاجة .. بطلوا الكلمة دي بقى .
ثامن حاجة .. لو فيه حد فضحنا و فرج علينا العالم يبقى مبارك مش غيره .. روحوا لوموا عليه.. ماتلموش على الناس السلمية المتحضرة .
الكلام يطوووول ..و كلنا محوشين كلام كتير اتكربس على بعضه .. ما كنتش عايزة اتكلم دلوقتي في الهيستيريا دي عشان أصلا محدش قادر يسمع حد في الفترة دي و في طاقة عدائية منتشرة .. بس أهو بقى بزيط في الزيطة .. ما النت رجع و كل الناس بتتكلم ..
بس عموما لينا كلام تاني ان شاء الله
آخر حاجة: دم شهداء الانتفاضة غالي مش رخيص ..مش هينفع ننساهم و نفرط في حقهم .. ربنا يغفر لهم جميعا و يرحمهم و يسكنهم فسيح جناته .
الله المستعان
