قبل ما طق :)

بكره ان حد يزايدني على حاجة مقتنعة بيها تمام الاقتناع

بكره أسمع محاضرات حافظاها

و بكره نفسي لما اقول حاجة و انا متأكدة انها هتخليني اسمع المحاضرة اللى حافظاها

بكره غسيل العقول

و بكره الكلام مع اصحاب العقول المغسولة

بكره اني ما اعرفش اعبر عن رأيي و أفكاري صح

بكره الشعور بالعجز لما ما بعرفش أعبر عن رأيي و أفكاري صح

و بكره لما بيبقى فات الاوان على اني أوضح كان رأيي ايه من الكلام اللى عبرت بيه

بكره لما اتحط في موقف الدفاع عن نفسي

بكره اندفاعي

و بكره غباء اللى قدامي لما بيبقى عايز يفهم من كلامي اللى هو عايزه عشان يرد الرد اللى هو حافظه

بكره شعوري بالضيق لما اللى قدامي يبقى فاكر انه بيفهم اكتر مني

بكره شعوري بالجهل قدام واحد بيدلل بعلمه على حاجة انا واثقة انها بتعبر عن وجهة نظره هو مش بالضرورة عن الحقيقة .

بكره لما بدي حجات هبلة أكتر مما تستحق

وبكره لما ما بديش حجات تانية أهم ما تستحق

بكره اني كبرت مع اني صغيرة

و بكره اني صغيرة مع اني كبرت !

يااااه كل ده بكره .. حقودة انا قوي

___________________________________________

انا مش اكتر حد بيفهم و عمري ما هبقى

انا حتى اصلا خبرتي في الحياة ضئيلة و علمي أقل أقل أقل من ضئيل

بس عندي عقل نفسه يفهم و يعرف الحقيقة أيا كانت

انا مش محور الكون

انا انانية و بقول انا كتير

بس دي مدونتي وانا حرة بقى

:P

___________________________________________

اكتر ناس بتتعب اللى دماغهم ما بتبطلش تفكير و في المقابل ما فيش فعل

و اكتر ناس مرتاحة اللى ما بيبطلوش كلام و في المقابل ما فيش فعل

______________________________________________

" ابني عقل .. و ما تملاش عقل " كلمة قالتها أمي انهرده و عجبتني

.....

ابني عقل يفكر .. ما تملاهوش بأفكارك انت حتى لو شايفها صح .. ما تحطش نفسك وصي على فكر حد .. مين قالك ان انت اللى صح ؟

ربي و علم و انصح و انقل خبرتك .. بس ما تقولش انهم هم الصح المطلق و ما فيش غيرهم صح .. ما تحطش نفسك وصي على فكر حد !!!

__________________________________________

'He who has a why to live can bear with almost any how."

________________________________________________

جامد التنين .. جامد السنين .. مين يزود ؟؟

حسبي الله و نعم الوكيل

بوست تافه ومالهوش لازمة .. مجرد هروب

PAC-MAN

في الأول و قبل كل حاجة : ما كنتش اعرف ان اللعبة ال .. اللطيفة دي اسمها pac-man

كنت مسمياها آم آم (أيوة بمد الألف) و انا صغيرة .. علشان الكورة الصفرة الصغيرة اللى بتاكل دي كانت بتقول آم آم آم آم وهي بتاكل ..

كنت بتفرج على أخويا الكبير و هو بيلعبها .. بس عمري ما جربت ألعبها بنفسي ..

عموما انا مش من هواة الجيمز .. أو زي ما بيقولوا نفسي قصير ..

لو كلامهم صح و نفسي قصير يبقى انا معذورة، لاني لازم أخسر في اي لعبة على الاقل 5 مرات علشان "ابتدي" افهم ماشية ازاي ..

المهم نرجع ل pac-man

"For the 30th anniversary of its release, Google changed its homepage logo to a fully playable version of the game."

في الأول حسيت انها لعبة عبيطة هقدر اتشطر عليها و افوز بسهولة ..

بس ما حصلش .. خالص

في أول مرتين كنت مستمتعة بيها اوي مش عارفة ليه حتى وانا بتاكل من الوحوش الغريبة دي

تالت مره كنت لسه بلعب .. بس مره في مره ابتديت أُستفز

كل شوية جيم اوفر كل شوية جيم اوفر .. اتغظت اوي .. و صوت اللعبة كان بيغظني اكتر و اكتر .. وبعد ما كنت بلعب باسترخاء .. خدتها بجد و بقيت بلعب من باب " ايه ده .. هو انا مش هقدر عليكي ولا ايه؟"

و بعد مرور وقت لا بأس به وعدة جولات خاسرة .. قلت لنفسي لأ بقى ..لازم اكسب المره دي .. كده مش هينفع .. مش هسيبها غير لو كسبت و لو مرة .. مرة ..مرة واحدة .. اكسب فيها .. و انتقم فيها من كل اللعب اللى هزمتني و ما قدرتش عليها ..

و شريط الذكريات عدى قدام عينيا .. وعدت قدامي كل اللعب اللى خسرت فيها .. و لاقيت نفسي بقول لنفسي " لأ مش هستسلم ..لازم أكسب علشان كل الناس اللى بتقول عليا نفسي قصير .. لازم اثبتلهم و اثبت لنفسي ان نفسي طويل " ..

صبرت و استحملت .. وتغاضيت عن غلاسة الوحوش .. و صوت اللعبة المستفز ..

وأخيرا ..

حصل النصر ..كلت كل النقط الصغيرة

و كسبت ..

فرحت اوي بالانتصار .. و حسيت بارتياح فظيع ..و كأنه كان هم على قلبي وانزاح ..

بس حصلت مفاجأة لم أتوقعها ..

ولاد اللذين عاملين مراحل في اللعبة ... و انا يادوب لسه بكسبت مرحلة الكريزاية

طلع في فرولاية بعدها .. وانا اصلا كنت خلصت ال 3 حيوات =(

ف الوحوش الغريبة اتلموا عليا وكلوني قبل ما افكر في اي حاجة =(

و برده قالي جيم اوفر

ما كانش عندي استعداد ابدأ من جديد خالص ..

فقررت اقفل الصفحة كلها .. و استسلم و خلاص ..

بس قبل ما اقفل افتكرت حاجة .. افتكرت اني فتحت جوجل عشان مذاكرتي .. عشان ال poetry اللى همتحن فيه أول مادة ..

ساعتها بس فهمت انا ليه كنت مستمتعة أوي في الأول باللعبة .. وليه كنت مصممة ان نفسي يبقى طويل فيها بعد خنقتني ..

و ساعتها قلت من كل قلبي ..

حسبي الله و نعم الوكيل

هو الناس بتوع جوجل دول مش بيراعوا الناس اللى عندهم امتحانات ليه ؟؟!!