وحشتيني

و الله زمان يا فانيليتي =)

فكرت في شكل جديد مع العودة الجديدة

بس شكلك كده أحلى

أي نعم اللون الأخضر ملهوش علاقة بالفانيليا و الشوكولاته

بس أنا حاسة ان فيه علاقة خفية بين الاسم وشكل المدونة مش عارفة أحددها

عشان كده قررت أخليكي كده ع طول ان شاء الله

هييييييه .. دنيا *

" أحب ليك الخير آه .... بس ما تبقاش أحسن مني !! "
بمنطق مين ؟!!!
_________________

ليه فى ايام الامتحانات بنبقى فاكرين اننا هنكسر الدنيا فى الصيف ، و لما يجي الصيف مش بنلاقى الشاكوش ؟!
زي بالظبت لما الآذان يأذن ..و تلاقي نفسك بتتفرج على الحاجة بشغف فظيع ، مهما كانت هبلة، زي مثلا فيديو على يوتيوب وبتقوم وقلبك يا حرام بيتقطع ( طبعا في ناس ما شاء الله بتقوم بكل سهولة ، ربنا يجعلنا منهم ) ... وبعد ما تصلي بتلاقيه مرزوع مكانه ماطرش ولا حاجة ، وعادي جدا مش فيديو رهيب زي ما كنت متخيل !!!

_________________

مش أنا بقول اني بحب القراءة؟ طيب ليه مش عارفة أقرأ الريدنج لست اللى عليا ؟!! ليه مش عارفة أمشي كلامي عليكي يا بت ؟؟!
________________

محمد هنيدي كان بيقول في الفيلم "ما تركزش عشان ما تهييسش"
و انا بقول "ما تركزش مع الناس عشان تعرف تبص فى وشهم" .. انا الأول كنت فاكره ان المنطق ده مش صحيح
واللى ميعجبنيش .. يبقى مع السلامة.. بس الأيام اثبتتلي عكس كده .. لو مشيت بمنطق مع السلامة و المركب اللى يودي
يبقى احسنلي اروح اعيش في جزيرة لوحدي لأن الدنيا مش هتمشي على مزاجي .. والناس مش هتتغير.. و لأني اتفرجت على فيلم كاست اواي مش عايزة اعيش في جزيرة لوحدي :) .. يبقى العقل و الواقع بيقول : "عادي بقى" ....
وهو ده يا رجالة شعارنا للفترة الجاية .
على فكرة انا مش بحب الكلام من نوع" الناس كلهم وحشين" و"ليه الناس بقت قاسية كده" و الأفلام دي ..مش بس مش بحبه .. بكرهه ..
بس مش عايزة اتفاجئ من تصرف حد .. وعشان كده متوقعة من أي حاجة من أي حد ..
ومش عايزة أزعل من حد .. لأني لو زعلت يبقى كنت معلقة آمال عليه.. ولو علقت آمال على حد تبقى غلطتي .. أصلا التعامل مع الناس مابقاش فيه منطق بتاتا ( ونصيحة لنفسي ولكل البشر ... ما تعلقش آمال غير ع اللى خلقك) .
طبعا ناس قليلين جدا جدا جدا خرجتهم برا الدايرة دي لأنهم فى دايرة الثقة ... وفي ناس هفضل أتمسك معاهم بمنطق "المركب اللى يودي"
على فكرة انا مش بقول اني أجدع الجدعان ... أنا انسان فى الأول والآخر وأكيد بغلط وبزعل ناس مني ..
وفى النهاية كل واحد بيشوف الحقيقة من وجهة نظره .. وانا ممكن أعمل تصرف ما ، يكون فلان مش متوقعه أو متوقع أحسن منه مني ويعتبره مثلا ندالة أو اي حاجة تانية ... عشان كده لازم ألتمس أعذار للناس قبل أي سوء ظن ، زي ما بلاقي أعذار لنفسي (يا رب أعرف أعمل كده على طول) ...
بس لو ثبت ظني ... يبقى عادي بقى :)
________________________

*" دنيا مالهاااش أمان .. اهوانا لا هبقى في يوم ملك الغابة .. ولا انت هيطلع عليك يوم تاني .. ممم وداعا" سكار.. فيلم الأسد الملك
العنوان كليشيه أوي بس انا بتلكك عشان اقول الكلمتين بتوع سكار دول :) ده الفيلم مليان اقوال مأثورة ( مأثورة بالنسبالي طبعا ... أو مفضلة يعني) زي "اسمها بطاطي مش بطاطا و هو مش الملك .. انت الملك؟!" و "مظفلته ..بس تملا التنك" و "هنا مكان الحرية .. لا قانون ولا مسؤولية" ... وكل الفيلم تقريبا لأني شبه حافظاه :)

بتحصل :)

(:

click the pic 2 enlarge it

نشااااز

هو : عايش فى دور الشيخ .
هم : عايشين فى دور اللى بيسمعوا الشيخ .

هو : عايش فى دور اللى بيغني .
هم : عايشين فى دور اللى بيسمعوا أغاني .

هو: عايشين فى دور مخرج بيعمل فيلم ليه معنى .
هم : عايشين فى دور اللى فهموا المعنى .

هو: عايش فى دور" الصايع" .
هم : عايشين فى دور المبهورين بيه .

مش دول بس أكيد .. فيه كتيرباشكال مختلفة .

كل واحد فينا فى قرارة نفسه عارف ايه الصح وايه الغلط ، أى واحد فطرته سليمه يعرف يفرق بينهم .. بس فى ناس بتختار ما تشوفش الحقيقة .. و فيه ناس بتشوف الحقيقة بس بتقرر تجاري التيار.
من حق أي حد يبقى ليه وجهة نظره الشخصية اللى يكونها بنفسه .. ليه الاختلاف بيخوف الناس ؟!
ماتسبش دماغك فاضية عشان متبقاش مطبلاتي لأي واحد يغني .

تيجي نتصالح ؟!

تيجي نتصالح؟!

تيجي نرجع صحاب وحبايب زي الأول؟

تيجي نبطل خناق مع بعض؟

تيجي نشوف الحجات الحلوة ونبطل نشوف الحجات الوحشة بس ؟

تيجي نبطل تعطيل لبعض؟

تيجي أساعدك و تساعديني نبقى أحسن؟

تيجي بس ننسى اللى فات ونفتح صفحة جديدة؟



طول عمرك أقرب حد ليا ..أنا أقوى وانت معايا مش وانت ضدي .. لو كل الناس بقت ضدي مينفعش انت تبقى ضدي ..لو كل الناس اتخلوا عني مينفعش انت تتخلى عني ..لو كل الناس زعلت مني مينفعش انت تزعلى مني .. لو كل الناس كرهوني مينفعش انت تكرهيني مهما كنت ومهما بقيت ..لو شفتيني بعمل حاجة تزعل لازم تاخدي بايدي وتساعديني و تفكريني بالصح مش تسيبيني لوحدي ، يعني لو مش انت اللى وقفتي جنبي مين هيقف جنبي.. لو اتدلعت عليكي شوية استحمليني متزهقيش مني ، يعني لو مش انت اللى استحملتيني مين هيستحملني ؟ الفترة اللى فاتت كانت من أسوأ الفترات اللى عدت عليا عشان كنت زعلانة مني .. بس انا جايه أصالحك عشان محتجاكي جنبي ،بالذات الفترة الجاية .

ها هتصالحيني ؟!

لعبتها

- قالت له : لنلعب !
- قال مبتسما : لنلعب .
- قالت : سأحدد أنا اللعبة .
- قال راضيا : لنلعب .
- قالت : سأكون أنا القائد .
- قال موافقا : لنلعب .
- قالت : سأكون أنا من يفوز .
- قال متغاضيا : لنلعب .
- قالت مبتعدة : لن ألعب .

في نص السطر!!..مممم...سيبوه فاضي

معرفش ليه من وقت لتاني بحب آجي هنا أبص ع المدونة وامشي تاني ، يعني بشوفها عايشة ولا صاحية ولا ايه حصلها...
والله بتوحشني ، معرفش ليه، بس مجرد اني ابص عليها وامشي حتى لو مقلتش حاجة بيخليني احس احساس كويس ..
و تقريبا السبب جزء منه هو اني بحس انها منظمة ومنمقة (أقصد من حيث الشكل) وده لأن عندي عقدة من الحكاية دي من زمان ..
أصل وانا فى المدرسة كانت كشاكيلي على طول عادية وعادية دي فى أحسن الحالات ، وكنت بقرف منهم بقى لما بشوف كشاكيل العيال "الفاضيين" اللى بيعدوا يرسمو ورد، ويكتبوا بألوان كتير، ويحطوا ستيكرز،ويعملوا كل صفحة بطريقة تسطير مختلفة،و أكيد كنت بقول عليهم فاضيين ساعتها عشان الاقي مبرر لمنظر كشاكيلي، يعني عيال في ابتدائي .. وراهم ايه يعملوه غير تظبيط الكشاكيل عشان المدرسة تتبسط منهم وتديهم نجمة *..دي قمة احلامهم ...
وياااااااااه بقى لما واحدة تاخد نجمة ، تلف الفصل كله توريها للبنات واحدة واحدة.. كأنها شبكتها، فهما طبعا مش هيسكتوا ... لازم يدوروا على اي نجمة فى فى اي حته عشان يكبسوها حتى لو كانت في كشكول من السنة اللى فاتت ...
الا بقى العيال اللى كانوا بيزوروا ويحطوا نجمة لنفسهم بدون علم من المُدرسة ، دول عقابهم ممكن يبقى الرجم من باقي الفصل . أنا بقى كنت باخد نجمة من غير ستيكرز والحجات دي خالص عشان كنت شاطرة (ده مش غرور دي ثقة لامؤاخذة).. حتى الهدايا كنت مستولية عليها ، يعني ممكن اخد هديتين فى نفس الحصة ، منساش أبدا يوم ما خدت مصاصة وشوكلاته وحاجة تالته كده مش فاكراها فى نفس اليوم ولما جت الفسحة .. وانا طالعة لا بيا ولا عليا لاقيت الفصل كله اللى هو مثلا 15 بنت طالعين ورايا .. كلهم عايزين يقلبوني بالذوق ، أصل كان عندنا ساعتها اللى المجموعة تمشي وراه وتخليه يقودها فى الفسحة ويقول يلعبوا ايه وميلعبوش ايه ويروحوا هناك وميجوش هنا لازم يبقى حد معدي ، فلاقيتهم بيسلموني السيف، والعرش، ورايات المجد بتوع فيلم محمد الفاتح، عشان كنت من الاثرياء فى نظرهم .. وطبعا ده كان ليوم واحد بس لأني كلت ثروتي بعد كده .
المهم نرجع لموضوع الكشاكيل .. فى ابتدائي الكشاكيل كانت شغالة والمدرسات كانوا بيظبتوها .. فى اعدادي كانوا بيقولوا على خطي حلو .. هو كان حلو ومنظم بس برده مكنتش بديله اهتمام كبير .. المختلف ساعتها اني كنت ابتديت أكتب بألوان تانية مع الأزرق .. اعدادي بقى وكبرنا ، بس برده كنت بتعقد لما أشوف كشاكيل العيال "الفاضية" ... فى ثانوي بقى بعت القضية .. ولا كشكول كان كامل وفيه الدروس كلها .. وبصراحة فيه مواد مكنتش بكتب فيها حاجة لأني أصلا بطيئة ومش بلحق أكمل حاجة ، غير كده كنت بغيب كتيييييييير ... مرة كنت فى حصة "رياضيات " ودي بالذات مكنتش بكتب فيها غير نادرا .. فالمدرس شافني أنا وصاحبتي هنغلط و ماسكين الاقلام وهنكتب، قالنا بكل تلقائية وبكل رحابة صدر "لا لا سيبوا الاقلام .. هتكتبوا ليه ، انتوا بس متتكلموش" ..أكيد مش بقول الموقف عشان فخورة بيه .. بس كل ما افتكره أضحك على رد فعل المدرس ..كان راجل طيب :) .
الموضوع مكنش عن الكشاكيل أصلا ، كان عن المدونة صح؟! ... آه، كنت بقول بقى ان المدونة دي بمثابة تعويض ، تقريبا عشان شبه الكشاكيل .. فأول مرة يبقى عندي حاجة منظمة كده .
بس برده أنا مكنتش جايه اقول كده .. بس كويس اني قلت اي حاجة لأني فى حالة غريبة جدا .. أول مرة أشوف حد بيفكر فى ولا حاجة .. بجد مش لاقية حاجة أفكر فيها .. يعني مثلا لما اقعد بيني وبين نفسي .. المفروض تجيلي أفكارعن اي حاجة .. أنا بقى مش بيجيلي أفكار..مبقتش أسمع فى دماغي كلام .. كل اللى سامعاه سكوووووووووووت وصمت عجيب .. الأول كان فيه ناس بتتحاورفى دماغي وساعات بيتخانقوا .. وساعات بقى جملة كده تيجي لوحدها كأن حد بيقولهالي ..مش عارفة الناس دول زعلوا مني ولا ايه (مش مجنونة على فكرة ) .من أول السنة لحد الامتحانات دماغي كانت هتنفجر من كتر التفكير..دماغي كانت مليانة بحجات كتير غير القلق .. لما بقى خدت أجازة نص السنة دماغي خدت أجازة معايا ... على فكرة دي حاجة أغبى حاجة .. لأني كنت عايزة أعمل حاجات ، المشكلة اني مش فاكرها هي كمان .. حاجة غريبة ...
بس كويس اني كسرت حاجز الصمت و افتكرت ذكريات الطفولة .. أصلا دي احسن حاجة بعرف أعملها..ومن الحجات اللى بتبسطني .. مش هروب من الواقع .. على قد ما هو تمسك بطفولتي .. فلو مكنتش هقدر أمنع نفسي من اني أكبربالسنين.. فهقدرأفكر نفسي بطفولتي طول ما ذاكرتي الحمدلله كويسة .. عشان كده على طول بحس اني بس من امبارح كان عندي خمس سنين ..ايه اللى خلاهم 17 فجأة ؟!!! الله أعلم !
خلاويييييييييييص دماغي فضيت ، هبقى اجي تاني ان شاء الله لما تتملي ، أو كالعادة فى عز موسم الامتحانات عشان الوحي بينزل ساعتها بس ..
آه صحيح قبل ما امشي .. فيه اكتشاف اكتشفته مؤخرا .. ان فيه ناس بتقرألي فى الخفاء ... ودول يندرجوا تحت الأغلبية الكاسحة من الجمهور اللى بتتكون(أى الأغلبية) من الأسرة و الأقارب والاصدقاء والمعارف .. جمهوري المراقب في صمت.. انا بجد اتبسطت لما لاقيتكوا بتسألوني ليه مش بتعملي تدوينات جديدة ... أنا كنت فاكرة ان فانيليا مش هتهمكم فى حاجة ..لأنها جزء من كل .. والكل ده أكيد خنقكم .. فمفيش حاجة جديدة عليكم ... بس اكتشفت ان انتم الوحيدين اللى ممكن تتقبلوا تفاهاتي والحجات اللى ملهاش دعوة ببعض اللى بقولها :) ... فتحية لكل من يتحمل تفهاتي من الأسرة والأقارب و الأصدقاء وأي حد معدي من هنا حتى لو بالصدفة .
يلا ألقاكم soon ان شاء الله .
SaLaM