إيه الفايدة
من انك تكتب كل كبيرة و صغيرة و كل تفصيلة في حياتك على فيس بوك و تويتر ؟
من انك تسيب صحابك في الكلية -المدرسة (بعد ما قضيت طول اليوم معاهم) و ترجع تقابلهم على النت؟
من انك تبقى مع صحابك في مكان وتكتب" أنا مع صحابي فلان و فلان في الحتة الفلانية" ؟ و طبعا مش هتنسى تعملهم تاج و هم أكيد مش هيتأخروا و يردوا عليك بعد ثواني.
من انك تبقى في مكان حلو مع ناس بتحبهم و تقضي كل الوقت بتصور في صور عشان ترجع توريهم لصحابك على النت؟
ليه
صحابك بيبقى دمهم أخف على النت و ما بيبطلوش ضحك؟
امك و ابوك عشان يعرفوا يكلموك أوحتى يندهولك من الأوضة اللى انت فيها في البيت لازم يكتبولك على "الحيطة" أو يبعتولك رسالة؟
و لما بيعملوا أكاونتس عشان يعرفوا يتواصلوا معاك برده بتحس ان دمهم تقيل - مش لايق عليهم - ايه اللى جابهم هنا؟
إيه الفايدة لما تبقى حريص توري الناس انك سعيد لما مش دي الحقيقة؟ و ليه تتبسط انبساط مش حقيقي؟
هو السعيد بيقول أنا سعيد؟
وليه تتشغل بتسجيل اللحظة عن اللحظة نفسها و تخاف تضيع لما انت عندك كاميرا اسمها ذاكرتك بتطلع صور أحلى من الحقيقة؟
ليه تبني حاجات في عالم افتراضي وانت عارف انه افتراضي..و ما تبنهاش في عالم الواقع..أيوه أصعب بس في النهاية هتبقى عارف انها واقع.
___________
دي أكيد مش دعوة ان الناس ما تشاركش و ما تسجلش أفكارها و مشاعرها.. بالعكس المواقع الإجتماعية عرفتنا لأي مدى التجربة الإنسانية واحدة و ازاي الناس في الآخر متشابهين و بيتشاركوا في حاجات كتير مهما اختلفت ظروف حياتهم(الكلام اللي بناخده في الكلية ده) و إحقاقا للحق الإيجابيات اللى الواحد شافها خلال تجربته مع النوعية دي من المواقع كان أكتر من السلبيات.
بس في النهاية كلنا عارفين ان الإفراط في أي حاجة وحش واننا نستفيد من الحاجة
بشكل سطحي وحش برده..بس الواحد بيفكر نفسه من وقت للتاني.
نصيحة اليوم:وقف شوية انشغالك بحياة الناس و هم بيقولوا ايه و عيش حياتك انت.
نصيحة تانية:لازم يبقى فيه وقت للناس و وقت لعيلتك و صحابك و وقت لنفسك..لما تعرف توازن مابينهم وتدي كل حاجة فيهم حقها ابقى قابلني :)
